Assam-a tui lian chuan ziaawm lam a pan mek zel a, tlanchhia tam takte pawh an haw leh hlawm tawh a; mahse, thil siam that leh tun din tur a tam hle a. Chief Minister Himanta Biswa Sarma chuan chhawmdawl leh chhiate siam that chu sorkar chona lian ber leh ngaih pawimawh ber a ni tih a sawi.
Tui a kâm mek zel a, mi 82 thi awm tawhin mi nuai hnih chuangin an tuar tih Assam State Disaster Management Authority (ASDMA) chuan a chhinchhiah.
Facebook Live session-ah Inrinni zan khan Sarma chuan tui hi a kâm zel a, a tuartu tam takte an inah haw mek zelin tam tak erawh relief camp-ah an la awm tih a sawi.
A tuartuten khawsak harsatna an tawh zui loh nana chhawmdawlna leh zangnadawmna pek chu sorkar ngaih pawimawh a ni a. Sikul siam that, vantlang thil tun din lehte chu hna hmasa a nih tur thu as awi.
“Sikul, anganwadi leh Naam Ghar siam thatna tur pawisa tam tak pek chhuah a ni tawh a, August 7 atang hian thil chhiate zir chian a ni bawk ang,” a ti.
Sivasagar leh Charaideo-a sikul chhiate tan Rs. nuai 2 theuh pek tur niin anganwadi chhiate tan Rs. nuai 2.5 pek tur a ni bawk.
State sorkar hian tui lian thlenna district-a sikulte chu August 10-a hawn hman vek a tum a, siam thatna tur sumte pawh pek chhuak a nih tawh thu chief minister hian a sawi a. Sikul uniform leh zirlaibu chhiate thlakna tur pawh a tel.
Sarma hian tui lian tuarte tun din lehna atan hian zirna chu an ngaih pawimawh ber a ni tih a sawi a, Sivasagar district-ah ringawt pawh sikul 550 tuar awmin Charaideo-ah tam takin an tuar bawk a. State sorkar chuan tui lian tuar district-te tan July thla electricity bill awltirin kum tluanin property tax awltir a tum bawk tih a sawi.
Lirthei, ranvulh leh thil dang chhiate hnena sum pek a nih theih nan insurance company 46 aiawhte a kawm tawh tih a sawi a. Pawisa an dawn theih nan lehkha an neih loh pawhin digital document tal nei turin mipuite a chah.
Chief minister hian Zirtawpni tuk khan cabinet a thutkhawmpui a, tui lian tuar chhungkuate chhawmdawl nan rang taka Rs. 15,000 zel pekna tur an pawm.
Inrinni khan pawisa hi a tuartute bank account-ah August 5 atangin a luh tur thu leh Rs. 10,000 dang pawh August 10-ah pek an nih tur thu a sawi.
Mi 10,000 chuangin tui lian tuarte tan bik Chief Minister’s Relief Fund-ah pawisa an chhung lut tawh a, state sorkar chuan a tahtawl zelin puih ngai leh chhawmdawl ngaite ngaihtuahin hma a la zel dawn tih Sarma chuan a sawi bawk.