Ruihhloin nasa takin min run a, kan mirin loh deuh deuh leh, khawtlang leh kohhrana mi inhmang tak takte inhnamhnawih an awm leh nawlh nawlh thin bawk.
A hlawkna lam ngaihtuah chuan a hlawk a, hausak phah thut tam tak an awm a, a nghawng erawh kan hnam hian kan chhiatpui zel thung chu a ni si.
Heti taka kan ram min luhchhuahtu ruihhlo hi a veiawm a, ngaimawh tling a ni a, kan ram hian hun thim kan luh mek avangin nasa zawka kan do a ngai hle.
Sorkar leh tlawmngai pawlten ngawrh zawkin do hna an thawk a, mahse a rem mawh hle. Ruihhlo tih hian a huap zau hle a, ganja thleng hian sorkar in kumin july thla thlenga a man ringawt pawh hi tam tawh tak a ni.
Heng ruihhlo hrang hrangte hian kan ram thalaite nasa takin a nghaisa a, chhungkaw tam tak nun a tibuai a, thinthia mu ngam lo tam tak an awm tawh bawk. Sorkar in nasa takin beihpui a thlak a, kan tlawmngai pawl lian ber Central YMA in a dotu bik hial inruatin beihpui an thlak chungin thahnem fe fe man tur a la awm reng bawk.
Mizote inngaihtuah chiang ila, kan ram thalaite min nghaisatu, kan dam titawitu leh chhungkaw tam tak manganga rumtirtu ruihhlo do tur hian beihpui thlak lehzual ila, sorkar hian ngaihpawimawhah nei lehzualin, kohhran thleng hian nasa zawkin tha thawh thei se, kiltin atangin do hna i thawk teh ang u.