Management Committee nen an indawr fel hnuah a vawi khat nan Labour, Employment, Skill Development and Entrepreneurship Department (LESDE)-in LPS Pro Fight title sponsorship an chang dawn.
LESDE chuan an hnuaia awm, Mizoram Building & Other Construction Workers’ Welfare Board (MBOCWWB) hmangin an sponsor dawn a. Mizoram infiamna huanga television live show hmasa, Pro Fight chu an hma lakna hrang hrang mipui hmuha pho chhuahna leh zirtirna zau zawk pek theihna remchang a nih ngei an beisei
LESDE Minister Lalnghinglova Hmar chuan Pro Fight chu Mizorama ngaihhlut leh mipui ngaihven a ni a, hei hi tangkaiah hman an tum tih a sawi a, “Sorkar hnuaia department-in a hre tur leh a chhawr turte hnenah hma an lakna hrilh hriat a ba a, hriattir an nih hnua mipuiin an ngaihven lo a nih chuan department mawhphurhna a ni tawh lo vang,” a ti.
Pro Fight vawi 11 neih tawhah tum khat chiah sorkar hnuaia department-in title sponsor an la chang a, kum 2010 khan Ayush hmingchawia kalpui a ni.
LESDE hi sorkar department zinga title sonsor ni thei pahnihna leh kum 16 chhunga sponsor-tu zinga lian ber ni leh hmasa ber an ni.
Championship hmasa ber, kum 2009 leh 2014-ah title sponsor awm lova buatsaih a ni a. Kum 2011-ah Adhunik MSP Cement, 2015-ah Samsung 3:16, 2017-ah Gionee, 2024-ah Zudio; 2016, 2019, 2022 leh 2023-ah Zothan Autoworks-in vawi li title sponsor an chang.
Pro Fight tum 12-naah hian kum 17 atanga 40 inkar a duh apiang tan Mizoram chhung leh pawn atangin a tel theih a. August chhungin LPS Office, Zarkawt leh Dozoma Tarmit Dawr, Zodin Square atangin tel tum tak form la chhuakin theh luh tur a ni.
Weight hrang panga – fly (kg 48-52), bantam (kg 52-56), light (kg 56-61), welter (kg 61-67) leh middle (kg 67-74)-ah title an inchuh leh dawn a. Lawmman pawisa fai sem chhuah tur Rs 6,50,000 ruahman a nih bakah best boxer, promising boxer, best challenger, best referee leh best judge chawimawina sem tel a ni bawk ang.