A khalhtu a tlanchhiat avanga ringhlelin police-in Truck an dapnaah methamphetamine ni ngeia hriat, kg. 72. 514-a rit an man.
Saitual Police chuan Zirtawpni zing dar 4:30 vel khan Keifang Kualmawi-ah Manipur atanga Aizawl pana tlan truck pakhat, hnam dang khalh chu endik turin an o tiding a. A khalhtu chu ram hnuai lamah a tlan chhe thut a, police-te hian umzui mah se an man hman ta lo a ni.
Truck khalhtu a tlan chhiat avang hian police-te chuan ringhlelin thuhretu mi pahnih awm laiin lirthei hi an dap zui a, methamphetamine ni ngeia hriat kg. 72. 514-a rit an hmu chhuak a. Methamphetamine an man hi a vaiin mum 616,100 a ni a, Rs. 58,01,12,000 hu nia chhut a ni.
Truck-a chuang ve hnam dang pahnih, Kaidul Islam Lasker, kum 21 leh Rafik Uddin Barbhuiya, kum 32, Assam-a Hailakandi disticrt-a 143 Pakua Punji Bhaibonti mi nia insawi ve ve chu man nghal an ni.
Saitual Police chuan ruihhlo man kaihhnawihah ND&PS Act hmangin thubuai an ziak luh a, truck khalhtu hi man tuma chhui zui mek a ni.