Aizawl: Sorkar leh kohhrante thawhhona atanga school enkawl dan tur, Public Private Partnership (PPP) rawtna chu pawm a ni.
Zirtawpni khan Mizoram Education Reforms Committee (MERC) meeting 16-na chu an chairman, Dr. Vanlalthlana, Education Minister hovin SCERT Seminar Room-ah an nei a, meeting-ah hian Mizoram zirna chungchang leh hmasawnna tur kawng hrang hrang an sawiho.
Meeting-ah hian sorkar leh kohhrante thawhhona atanga school enkawl dan tur PPP rawtna chu pawm a ni a, he hmalakna tihhlawhtlin nan hian pilot project hmangin school thlan tur zat leh a hmun turte pawh ruahman fel thuai a ni ang.
MEdS (Common Service) Rules, 2026 chungchangah Draft Mizoram Education Service Rules chu siam that ngaite siam thain pawm phawt a ni a, MERC meeting leh hmasa berah peih fel tura ruahman a ni.
Hei bakah hian Transfer & Posting of School Teachers Rules, 2026 pawh hman theih tura ruahmanna kalpui mek niin hun rei lo teah peih fel tum a ni bawk.
Heng hmalakna lian tak tak piah lamah hian tunlai Mizoram zirna atana thil pawimawh leh hmasawnna hna thawh tur kawng hrang hrangte an sawiho bawk.