Aizawl: Sorkar hriatpuina lova petrol leh diesel zawrh chhawn chu dan bawhchhiatna a nih avangin Aizawl District Magistrate Er. Lalhriatpuia chuan Aizawl district huam chhungah mi tumah phalna nei lova petrol leh diesel zuar leh hralh lo tur leh, danin a phal chin aia tam kawl lo turin khapna thupek a tichhuak.
He khapna thupek hi Section 163, BNSS 2023 thuneihna hmanga chhuah niin, Section 5 & 6 of the Mizoram Motor Spirit and High Speed Diesel (Prevention of Malpractices in Supply & Distribution) Order, 1992 kalh zawnga dan kalha a hmuna hralh chhawng thinte venna atan leh kangmei laka mipuite an him tlan zawk nan a ni.
Petroleum Act, 1934 (Section 7 & 8) tar lan danin, license ngai lova mi malin petrol (Class A) an kawl phal chin hi litre 30 (zawrh tur ni lo, mahni hman tur chauh) leh diesel (Class B) litre 2,500 (container pakhat zela litre 1,000 aia tam lo dawngah) a ni.
Aizawl DM thuchhuah hian he thupek zawm lo te chu an petrol leh diesel te man sak an nih bakah Section 223 BNS 2023 hmangin an chungah hremna hrang hrang lek a ni ang tiin a tar lang.
He thupek hian August 3, 2026 atanga tanin thla hnih chhung a huam ang.