Aizawl: National Students’ Union of India (NSUI) Mizoram State chuan School Education leh Higher & Technical Education Minister Vanlalthlana chu a pisaah Thawhlehni khan hmuin, Mizoram zirna tihmasawnna tura rawtna hrang hrang an thlen.
NSUI chuan Mizoram sorkar hnuaia thawk mek Casual Teacher 1,475-te hlawh chu a rang lam a tihpun sak turin Minister hi an ngen a. Primary leh Middle School-a thawk Casual Teacher te hlawh ni khata Rs. 570 leh Rs. 730 vel chauh an hlawh mek chu inhlawhfa leh mistiri hlawh zat pawh a pha lo tiin, hei hi thalaite leh zirtirtu hna zahawmna tihbawrhbanna a nih thu an tar lang.
MUP leh Mission/Programme hrang hrang hnuaia thawk zirtirtute hlawh inrem lo nuaih pawh zirtirtu zawng zawng tana inang tlanga siam dan kawng zawng turin sorkar an ngen bawk.
Hei bakah hian HSLC leh HSSLC result tihchhuah dan tharah division hrang hranga pass zat leh result quality mipui hriat theih lova thup ta tlat chu pawi an tih thu sawiin, hei hian zirna a titlahniam ang tih an hlauhthu an sawi.
NSUI chuan result quality leh data pawimawhte mipui hriat theih tura tarlang leh tur leh Top 10 chungchanga sorkar kalphung fiah lo tak chu inenpui turin an ngen a, zirna siamtha tura sorkar thawhpui an inpeih reng chungin zirlaite tana tha lo erawh dodal tlat an tum thu an sawi bawk.