Aizawl: Mizoram Consumers’ Union (MCU) chuan LPG Gas connection nei zawng zawngte chu Govt. of India leh Indian Oil Corporation Ltd. (IOCL) thu chhuak angin August 16, 2026 hma ngeiin E-KYC tifel vek turin mipuite an ngen a, gas distributor-te pawh an consumer-te E-KYC la ti lote chu a thlawna tihsak vek turin an ngen.
MCU thuchhuahin a tar lan danin, IOCL thupek angin gas distributor-ten special camp-te buatsaihin, veng leh khaw tinah an consumer E-KYC la ti lote chu a thlawnin hun tiam chhung ngeia tihsak tura ngen an ni. Mipui mahnia ‘IndianOil One’ App hmanga ti thiamte pawhin awlsam takin mahni telephone hmangin a tih theih bawk.
MCU chuan hun tiam August 16 a ral hnuah chuan E-KYC ti lote hian gas hi a man tlawmin (domestic rate) an lak theih tawh dawn loh bakah subsidy pawh an hmu tawh dawn lo a ni tiin an tar lang.
Hemi atan hian veng leh khaw tina Village Council (VC), Local Council (LC) leh MCU Branch-te chu distributor-te lo be pawpa hma lo lakpui turin an ngen bawk.