Aizawl: Mizo Zirlai Pawl (MZP) Emergency Executive Committee chu an President Dr. C. Lalremruata kaihhruaiin Thawhlehni khan MZP Pisapui, President Room-ah an thukhawm. Mizorama hna latu lian ber, MPSC hna lak chungchanga thalaiten harsatna hrang hrang an tawhte an ngaihtuah a. MPSC-a harsatna tawk zawng zawngte leng turin an sawm.
MZP chuan tun hnaia MPSC chetsualna hrang hrang avangin Mizoram thalai hna zawng mekten MPSC-ah rinna an nghah ngam loh phah mai dawn nia hriain MPSC chu thuam chak a nih theih nan leh a thawktu lak belh an nih theih nan hmalak ni se an ti.
MZP chuan theihtawp chhuahin MPSC hna lak avanga buaina tawkte chu an buaipui reng thu sawiin, One Time Registration (OTR) avanga hna diltu thalai tam tak hnawl tawhte leh written exam fel vek tawh hnua OTR fel loh avanga hnawl awm leh thin te chu pawi an tih thu an sawi.
Hemi chungchang hmalak chhunzawm dan tur sawiho pui tur hian, OTR leh MPSC hnalak avanga harsatna tawk zawng zawngte chu Nilaini chawhma dar 11-ah MZP Pisapui, Treasury Square-a leng turin MZP chuan an sawm a ni.