Ruihhlo sawi a bang thei lo a, damdawi hmansualna a nasa telh telh bawk. A mamawhtu an tam zel tih hriatna chu man a awm reng bawk tih atang hian a niawm e.
Heti taka kan ram min runtu leh min nghaisatu ruihhlo hi kiltin atanga kan nawr tawm a, kan do a, tha kan thawh tlan a va ngai nasa em.
Sorkarin theihtawp a chhuah a, tlawmngai pawl lian ber YMA in nasa takin beihpui an thlak bawk. Heti chung hian nitin tam tak man tur a la awm reng a, man hman loha thenbo ta engzah tak awm bawk ang maw?
Kan ram dinhmun hi a him lo a, kan thalaite leh thangthar lo la awm zel turte dinhmun, kan tu leh fate hmachhawn tur hun hi a thim asin. Kut kuangkuaha thut mai mai chi a ni tawh lo, ke kan penchhuah theuh a ngai.
Midang tihturah dah chi a ni lo a, kut kan thawh theuh a ngai. Chuti a nih loh chuan kan ram hian hun thim lehzual a hmachhawn thei reng.
Ruihhlo avanga sumdawng nia rinhlelh kan nei a ni thei. Heng mite hi kohhran leh khawtlanga mi challang tak takte pawh an ni ang. Thiltih engkimah sum hmanga tlawmngai leh inpe thei tak tak pawh an lo ni thei e, mahse kan hnawl ngam hi a va hun tak em.
Kawng dik zawh tur hian huaisen a ngai ve tho a, huaisen tur chuan midik nih a ngai bawk. Chutiang mi chu Mizoah hian kan la awm, ila awm. Dan dik lova ruihhlo hmanga sumdawngte do tur hian puanven sawichhing ang u aw.