Aizawla boxing zirna gym neitute chuan LESDE Labour Link LPS Pro Fight vangin boxing zir a let deuhthawin an pung a, boruak a nung thar leh tih an sawi.
June 29 khan a vawi 12 nan LPS Pro Fight buatsaih a nih tur thu puan a ni a. Heta tang hian Aizawla boxing zir theihna gym 15 velah zirlai an pung a, Lungleiah pawh a hma aia tam daihin boxing gym an pan.
Aizawla boxing zirna kalpuitu gym hrang hrang inthurualin June laihawl khan Organising Committee Chairman Lalsawmliana Pachuau an lenchilh a, Pro Fight buatsaih leh tura an ngen rualin boxing boruakin hniam lam pan mek tih sawiin naupang leh thalai zingah boxing zir an tlem tial tial tih an sawi.
Aizawl boxing gym zinga lian ber, Sete Boxing Academy neitu, R Lalhmachhuana (Sete-a) chuan Pro Fight neih tur a nih thu puan a nih hmain an hnena boxing zir thin an tlem hman viau a, tunah chuan inziak lut pung zelin 100 chuang an ni tawh a, a hma nena khaikhinin a let deuhthawin an tam tawh tih a sawi.
Sete-a chuan, “Kum 2021-ah Lalrinsanga Tlau chuan professional boxing luhchilh Mizo zinga hmasa ber a ni a. Hetih lai hian Aizawlah keimahni chiah boxing gym pangngai kan awm a, heta tang hian awm belhin kum 2022-ah Pro Fight tharthawh leh a nih atangin a pung chho ta hle a ni,” a ti.
Nikum khan Mizoram boxing boruak leh thil hrang hrang avangin Pro Fight neih a ni lo va, boxing zir tlem tial tialin boruak a tla hniam hman hle tih sawiin Sete-a chuan, “Gym thenkhat phei chu mumala kalpui zui loh a awm tawh a, tun Pro Fight avangin an tinung thar leh a, boxing boruak pawh a nung chho leh mek a ni,” a ti.
Alpha Gym neitu, Lalchhuanmawia chuan Pro Fight vangin an hnena boxing zir an awm leh nual tawh tih a sawi bawk a. Pro Fight boxer hriat hlawh tak ni thin, Andy Chuaua chuan Lamka, Manipur-ah boxing zirna dinin a gym atang hian Pro Fight-ah boxer 10 atanga 15 vel tel tumin an inbuatsaih tih a sawi.
Pro Fight middleweight champion F Lalthanliana Jr chuan Sete Academy thawhpuiin nikum May khan Ramthar Veng, Lungleiah Thanliana Fitness Club a hawng a, Lungleia boxing gym hmasa ber a ni nghal a, Aizawl ang thovin tun dinhmunah a hma aiin boxing zir a let dawnin an tam tawh a ni.
Pro Fight-a tel duh tan August chhungin LPS Office, Zarkawt leh Dozoma Optical, Canteen Kual, Dawrpuiah form lain a theh luh theih a. September 4-ah LPS Arena, Falkland-ah inbukin boxer-te hriselna endik nghal a ni ang a, September 8-ah an inhnek tan ang.