Aizawl: New Delhi-a cham mek Sports & Youth Services leh Tourism Minister Lalnghinglova Hmar chuan Nilaini khan Ministry of Development of North Eastern Region (DoNER) hotute kawmin, ministry hnuaia Mizoram project hrang hrangte chak zawka kalpui dan tur leh hmachhawpte a sawipui.
Minister hian DoNER Secretary Katikithala Srinivas chu a pisa-ah kawmin, sports leh tourism hmasawnna tur hmalakna hrang hrang a sawipui a. Aizawl chu thlasik khawpui (Winter Capital) ni thei tura December thlaa ‘Winter Festival’ lian tham buatsaih an tum thu leh Ministry puihna an mamawh tur thu a sawi.
DoNER Secretary chuan Mizoram chu ziak leh chhiar tamna leh sik leh sa nuam a nih vangin ‘education hub’ ni thei tura theihna nei a nih thu sawiin, Ministry pawhin theihtawpa puih a inpeih thu a lo hrilh bawk.
Minister chuan DoNER Joint Secretary Dr. Vipul Aggarwal, Statistical Advisor Dharmvir Jha, leh Deputy Secretary Silabhadra Das-te kawm bawkin, Mizoram football hmasawnna project te leh NESIDS-OTRI scheme hnuaia Rs vbc 38.4 senga ‘Centre of Excellence’ (Combat Sports/Boxing) sak tur tender chhuah tura buaipui mek dinhmunte a sawipui bawk.
Minister hi a PS H. Lalramenga’n a tawiawm.