Aizawl: Tual chhung politics-a Chief Minister Lalduhoma beih a nih dan chungchangah ZPM Thalai General Headquarters chuan opposition party-te chu politics-a inbeihna tenawm leh ram hruai tlak an nih loh zia tilangtu an ni tiin an dem.
An thuchhuahah ZPM Thalai chuan, Congress Party-in Chief Minister Lalduhoma poster duk dak lo tak siama khawlaia an tar chu inbeihna tenawm leh Mizo Kristiante tih atana mawi lo a ni tiin an dem tak zet a, hetiang politic ze hlui hi sim tawh turin an chah a. Chutihrualin kum 1986 Mizoram Peace Accord chungchanga CM thu sawiah MNF tan huat tur pakhat mah lo a awm nia an hriat thu an tar lang bawk.
July 31, 2026-a Mizoram Law College Freshers Social-a CM Lalduhoma’n Inner Line Permit (ILP) leh Memorandum of Settlement 1986 chungchanga thudik tlang taka a sawi chungchang tar langin, ZPM |halai chuan CM-in ILP hmansual a nih daidanna tur leh invenna tur zirlai zinga a sawi hi dawihzepna a ni lo va, thangtharte tana kawhhmuhtu dik tak a nih thu an tar lang a. MNF leh Congress-ten hun reilote chhung thudik chanve hmanga mipui an lo awmtlei thinna chu sim a ngai tawh a ni, an ti.
August 4, 2026-a MNF-in Total Bandh sawi ria CM Lalduhoma beih an tum mek pawh thil nihna hmachhawn ngam lohna a ni tiin, MNF te chu thudik hmachhawn ngam turin an chah a, Mizoram mipuite pawh heng Total Bandh buatsaih tura hmalakna hi zawmsak lo turin an ngen nghal bawk.