Aizawl: Mizoram Govt. Adhoc Aided High School Teachers’ Association (MIGAHTA) huaihawtin Nilaini khan Mizoram hmun hrang hranga adhoc high school 90 chuangah an school-te dinhmun hniam zawka dahna sorkar notification an hal.
He notification halna hun hi khaw tam takah School Managing Committee, All NGO leh village council (VC) ten an hmanpui a ni.
MIGAHTA chuan July 29, 2026-a Vanapa Hall kawta sit-in demonstration an neih tumin MZP palaina leh education minister hriatpuinain Political Adviser to CM (ZPM Vice President) Lalmuanpuia Punte nen an inbia a. Chutah chuan August 12, 2026-a Political Affairs Committee (PAC) meeting-a an thil phut ngaihtuah an tiam avang leh inbiakna leh meeting thlen hmaa Category S 1 notification tihchhuah rih loh an tiam avangin July 30, 2026 khan an lungawi lohna lantirna chu an chawlsan.
Amaherawhchu, sorkar chuan an inremna bawhchhiain August 4, 2026 khan adhoc high school-te dinhmun hniam zawk, Lump-Sum-Grant-in-Aid (Category S 1)-a dahna notification hi a tichhuak a. Hei hi MIGAHTA chuan a hma a provincialised dinhmuna dah an nih tawhnate thil tichhia leh an dinhmun tihhniamsakna lian tak a ni tiin, notification tihchhuah a nih duh lohna entirnan nimin khan an hal ta nghal a ni.
Nilainia MIGAHTA Executive meeting chuan an school-te hi provincialised dinhmuna dah leh turin sorkar an phut a. Tuna notification tichhuah tak hi cancel a nih hma chuan August 6, 2026 atang hian tiamchin awm lovin mass casual leave lak an tum nghal bawk.
Hei bakah hian August 7, 2026 hian mahni veng leh khua theuhah Managing Committee, VC leh NGO-te nen school dinhmun tlakhniamtir a nih chungchang hi joint meeting hmanga ngaihtuah zui an tum bawk a ni.