A vawi khat nana buatsaih tur, FIFA ASEAN Cup 2026 chu September 21 atanga tan tura ruahman a ni a, he inelna hi ram hrang hrang inkara football inelna tihzauh zelna kawnga hmalakna pawimawh tak a ni.
Team 14 inel turte hi FIFA ranking azirin division pahnihah then an ni a, division tinah group hnih ve ve a awm ang a. Division 1-te hian Indonesia-ah khelh a ni ang a, Division 2-te inkhel hi Hong Kong-in an thleng thung ang.
India tan chuan nakum FIFA qualifier an khelh hmaa team thate laka an inenchhinna tur a nih bakah inelna liana tawnhriat an neihna tur a ni thei bawk.
FIFA ASEAN Cup 2026 hi a tel ramte tan inpho chhuahna kawng bakah lawmman sum dawn tur a tam em vangin a pawimawh hle a. Lawmman tling khawm hi $ maktaduai 4 (Rs. vaibelchhe38.25) aia tam a ni.
Division 1 champion hian $1,000,000 (Rs. vaibnelchhe 9.56) an dawng dawn a, ram leh ram inelna zingah pawh a lian ber zinga mi a tling hial a. Division 2 champion hian $300,000 (Rs. vaibelchhe 2.86) an dawng ang a, hei pawh hi a tlem hran lo hle.
Division pahnih champion bakah a tel football ram 14 hi an chet tha emaw, che tha lo emaw, $1,25,000 (Rs. vainelchhe 1.19 vel) an dawng dawn bawk.
Division 1-ah hian team pariat awmin group pahnihah team li ve vein an then a. Division 2-ah erawh team paruk awmin group pahnihah team thum ve vein an then thung.
Group-a pakhatna te chu final-ah an tlang ang a, pahnihnate chuan pathumna zawnna match an khel thung ang.
India chu Division 1 Group A-ah Malaysia, Singapore leh a thlengtu Indonesia te nen an awm a, Division 1 Group B-ah erawh Pakistan, Vietnam, Thailand leh Philippines te an awm thung.
Division 2 Group A-ah a thlengtu Hong Kong, Brunei leh Myanmar te an awm a. Group B ah erawh Cambodia, Laos leh Timor-Leste te an awm thung.