Aizawl: ZPM Thalai General Headquarters chuan MINECO-a Economics & Statistics Directorate building sak a nih dan chungchangah eirukna a awm ngei nia an hriat avangin Ningani khan Anti-Corruption Bureau (ACB)-ah corruption complaint/FIR an thehlut.
ZPM Thalai tar lan danin, he building hi kum 2014 Congress sorkar laia Robert Romawia Royte firm NECS sak a ni a. Kum 2021-a a building hnuai lam sak chhunzawm tura rawtna a awm hnua PWD Quality Control-te inspection neihnaah a building structure chu a nih dan tur M20 grade aia hniam (M10 grade aia hniam vek) a nih thu leh sak chhunzawm chi a nih loh thu an hmu chhuak a ni.
Chutiang bawkin kum 2023-a Joint Inspection Report leh Accountant General (AG) Audit hmalaknaah te, Mizoram State Project Monitoring Committee-in June 9, 2026-a inspection an neihnaah te he building sak a nih danah hian Mizoram Procurement Rules bawhchhiatna leh thil dik lo eng emaw zat a awm a, building pawh a him lo hle tih hmuhchhuah a nih thu an tar lang bawk.
ZPM Thalai General Headquarters Secretary Boris Zoremsiama (Vigilance Dept.) hmingin he complaint hi theh luh a ni a; ram leh hnam ro tling tur vawnhim a nih theih nan ACB-te pawhin he case hi chiang taka chhuiin, a mawhphurtute lakah dan anga hremna na tak pe ngei tura an phut thu an tar lang.