Aizawl: Zo Re-unification Organisation (ZORO) chuan ‘World Indigenous Day’ (Tualto Hnamte Ni) an hman turah Zofa zawng zawngte mahni hnam thuam inbel chhuak vek turin an sawm.
ZORO hruaituten Ningani khan Aizawl Press Club-ah thu thar thehdarhtute an kawm a. An Vice President L. Ramdinliana Renthlei chuan August 9 khian ‘World Indigenous Day’ (Tualto Hnamte Ni) hman an tum tih sawiin, khawvel hmun hrang hrang a tualto hnam te ni chhinchhiahna, World Indigenous Day (International Day of the World’s Indigenous Peoples) chu hnam tlem zawkte chanvo humhalh leh an nunphung chawimawi nan hman leh a ni dawn tih a sawi.
He ni hi Zofate tan pawh pawimawh tak a nih thu sawiin, khawvel hmun hrang hranga tualto hnamte dinhmun chawikan, an dikna chanvo humhalh leh an zalenna leh inrelbawlna zahsak a nih theih nan atana hman thin a nih thu a sawi a. He ni hian Zofate pianphung, zai leh lam, chanchin leh tawngte bo mai laka humhalh a, thangtharte hnena hlan chhawn zel a pawimawhzia a pho lang a. Hei bakah hian Zofa zawng zawngte tana inpumkhatna leh chhul khat kual an ni tih inhriat tharna atan leh ziarang vawnhimna atan he ni hi hman a ni bawk, a ti.
ZORO Vice President chuan he ni hi Millennium Centre atanga Vanapa Hall thleng Zo hnam thuama inthuama kawng zawhin, Vanapa Hall-ah hun hman chhunzawm a nih tur thu a sawi a. World Indigenous Day hi United Nations-in Tualto Hnamte chanvo humhalh leh an dikna chanvo (UN Declaration on the Rights of Indigenous Peoples) a puan chhuahna ni chhinchhiahna a nih avangin Zofate tan hlut hle tur a nih thu a sawi bawk.
L. Ramdinliana Renthlei chuan UN-in August 9, 1982-a Tualto Hnamte dinhmun ngaihtuah tura Geneva-a thutkhawmna a neih atanga vawiin thlenga Tualto Hnamte dikna chanvo a buaipui tih sawiin, he ni hi Zofate inpumkhatna entirnan leh hnam zia leh tawngte vawnhimna atana hmang turin Mizo mipuite a sawm a ni.