Aizawl: Mizo Hmeichhe Insuihkhawm Pawl (MHIP) hruaitute chuan tun hnaia hmeichhe thuam hmanga insawisak leh indeusawhna thleng chu pawi an tih thu an sawi.
Ningani khan Aizawl Press Club-ah thu thar thehdarhtute kawmin MHIP hruaitute chuan, hmanlai tawngkam ‘Pawnfen fentir tlak i ni’ tih ang chite leh hmeichhe thawmhnaw hmanga indeusawh thin hi tunlai khawvel leh politics-ah hman leh lanchhuahtir chhunzawm chi a nih tawh loh thu an sawi a; social media khawvelah Mizo hmeichhe incheina leh hnamdang thawmhnaw hmanga insawisakna hian hnam mualphona a thlen avangin sim hmak a, fimkhur tlan a tul tih an sawi.
Mizo incheina leh sorkar hnuaia GI Puan humhalh a nih thu sawiin, Puanchei te, Tawlhlohpuan, Hmar-am, Ngotekherh leh Pawndum te hi sorkarin a hmanna tur leh hman lohna tur a tichhuak a, zawm a hlawh tawk lo nia an hriat thu an sawi.
Hnamdang pasal neih loh inzirtirna kalpui chu tha an tih rualin, Mizo hmeichhia fel tak tak an tam avanga hmeichhiate chauh thlur bika tawngkam dengkhawng leh hmuhsit rawngkai zawnga hmalak vak hi a dik loh thu leh, tumah rilru na lova hmalak ho a pawimawh zawk thu an sawi.
Tualthihna leh kutthlak chungchangah pawi an tih thu sawiin, Mualthuam North khuaa kum 15 mi Ramdinpuii ruang hmuh a nih chungchangah pawi khawihtu chu man chhuaha na taka hrem ngei an phut a, Mizo hmeichhe leh naupangte himna atan MHIP chuan a tawp thlengin hma a la zel dawn tih an sawi.