Bollywood lemchan thiam, film hit tak taka lo inlan tawh Ameesha Patel chuan mal tlat nun nuam a tih thu sawiin, pasal neih lam a ngaihtuahnaah a awm loh thu a sawi.
Kum 51 mi a ni ve tawh a, kum upa chan a chang chho mek. Hetih lai hian Ameesha Patel chuan pasal neih tumna a neih lem loh thu leh mal tlat nun chu nuam a tih thu sawiin, mal tlat tluan mai pawh a inrin thu a sawi.
Tun hnai khan X-ah Ameesha Patel chuan post siamin, inneih nawmna leh hlimawmna hi ka hre lem lo, pasal neih kher hi tul ka ti hran lo. Min hmangaihtu chhungte leh thian tha tak tak za chuang ka nei a, chung zawng zawng laka ka nun min thlaksaktu tur mi pakhat lo awm ve hi tul ka ti lo, a ti.
Nikuma a interview-na pakhatah inneihna chungchang hi lo sawi tawh bawkin, inneihna hi ka ngaihlu a, ka thiante tam takin kawppui neia chhungkua an din hi ka lawmpui hle. Mahse, keima chunga han thlentir ve tur chuan phurna leh tumna ka nei ve lem lo, mahnia hlim taka awm a, thiante nena a khat tawka hun hlimawm hman leh thin hi ka duhthusam a la ni reng a ni, a lo titawh bawk.
Ka tleirawl lai chuan pasal han neih a, chhungkua han dinte chu ka suangtuah ve thin ngei alawm, mahse ka hun hman chhoh mek nen hi chuan pasal han neih hi tum chhinna ka nei ngai lo. Ngaihzawngte chu han nei ve thin mah ila, mal tlat nun bawk hian ka lung min len leh zawk thin, a ti.
Ameesha hi kum 2024 khan Tauba Tera Jalwa movie-ah changin, hei hi a film chan hnuhnung ber a ni a, tunah hian hmachhawp a nei leh niin hriat a ni a, mahse amah chuan engmah a la sawichhuak lo thung.