Mizoram Public Service Commission (MPSC) siam that nawrna kal zelin Mizo Zirlai Pawl (MZP) General Headquarters chuan Thawhtanni khan MPSC-a thawktute pisa kai tur an dang.
Thawhtanni chawhma dar 10 pelh khan MPSC chairman leh a thawhpui dangte pisa panin an kal a, MZP chuan kawngkhar bulah an lo dang a ni.
Pisa chhunga luh tumna a awm avangin MZP leh police-te chu hun rei lote chhung an innawr buai hman a; inhliam an awm lo va, thil duhawm lo dang erawh a thleng zui lo va, MPSC chairman leh hotu dangte pawh pisa chhunga lut chuang lovin an let leh a ni.
MZP President Dr. C. Lalremruata chuan MPSC zahawmna leh thalaiten MPSC an rinna a tlakhniam tak avanga siam that hnatlang ko an nih thu a sawi a. Ni hnih chhung tharum tel lova lungawi lohna an lantir hnuah pawh sorkar leh MPSC lamin an thil phutte an tihhlawhtlinsak loh avanga pisa kai tur hi dang ta an nih thu a sawi.
Dr. Lalremruata chuan thalaite leh zirlaiten thil an phutte tihhlawhtlin a nih hma chuan he lungawi lohna lantirna hi an chhunzawm zel dawn thu leh MZP General Assembly thulh ngai khawpa hmalak a ngai a nih pawhin an tawlh hnung dawn lo tih a sawi zui bawk.
MPSC chairman-in MZP hi an thil ngiat sawihopui tura sawmna an lo siam tawh thu sawiin, MZP president chuan zirlai hruaitute chauh ni lova MPSC-a hna diltu aiawhte leh college students’ union (SU) hruaitute tel lo chuan inbiakna an neihpui theih loh tur thu an lo hriattir tawh tih a sawi bawk a ni.