Aizawl: Mizoram Merchant Association (MIMA) hruaitute chuan Nilaini khan Bawngkawn Local Council (LC) Office tlawhin, Bawngkawn area chhunga dan lova hnam dang dawrkai leh Mizo hming hawha dawr neite tihtawp tura LC-te hmalakna an thlawpzia lantirin lawmthu an sawi.
An inkhawmnaah hian Bawngkawn Local Council-te hmalak dan report leh MIMA ten kum 2011 atanga hemi kawnga hma an lo lak tawh dan te zirho a ni a. Chhinga Veng Local Council leh NGO-ten an area chhunga hetiang hmalakna hlawhtling tak an lo neih tawh te tar langin, Mizo eizawnna chhuhsak an nih lohna tura hetiang hmalakna hi veng tin leh khaw tinah neih chhunzawm zel a pawimawh thu an sawiho bawk.
MIMA hruaitute chuan Bawngkawn LC te hemi kawnga an hmalaknaah an hnungah an ding tlat dawn tin an sawi a. Bawngkawn LC te hmalakna lawmthu sawinan leh thlawpna lantirnan Rs 10,000 an hlan.