Aizawl: All India Adivasi Committee member Er. Sanghrima Chongthu chuan tun hnai kum 10 chhungin BJP leh a sangawi zawnpuiten hnam mawlte leh tlangram chengte an nek chep nasa tih a sawi.
Inrinni khan Aizawl Press Club-ah thu thar thehdarhtute kawmin Er. Sanghrima chuan Adivasi-te chu Scheduled Tribe leh Tribal Forest Dweller-te an nih thu sawiin INC-in sorkarna a chelh lai khan hengte hi dimdawi takin an enkawl thin tiin a sawi a. Chutih laiin tun hmuna Uttar Pradesh, Bihar leh Madhya Pradesh-ah te chuan nasa taka nek chep leh rahbeh mek an nih thu a sawi.
President atan Adivasi, Droupadi Murmu ruat a ni chu hmakhua ngaihna vang anga tar lang chunga SC/ST quota tihbo tum mek a ni chu thil tenawm tak a nih thu leh India-a Adivasi leh Dalit-te endawng an nih dan tilangtu a nih thu a sawi bawk.
Er. Sanghrima chuan Mizoramin Land Rights neitu nihna a neih ang te hi India rama ST leh Adivasi dang ten an neih loh bakah chhuhsak mek an nih thu sawiin, he thil thleng mek chungchangah hian Zo fate an thanharh a tul ta hle a ni tih a sawi.