Larsap General (Dr) Vijay Kumar Singh chuan Inrinni khan Aizawl Lammuala Independence Day 2026 lawmna neih zawhah sawm bikte pualin Lok Bhavan Circular Lawn-ah “Governor’s At Home” a buatsaih.
Governor’s At Home-ah hian Chief Minister Lalduhoma; Chief Minister hlui pahnih – Lal Thanhawla leh Zoramthanga, Speaker Lalbiakzama bakah sawm bik mi pawimawh dangte an tel.
Hemi puala a thusawiah Larsap chuan ram zalenna tura inpe Lalnu Ropuiliani, Nikuala, Lianphunga Sailo, Zakapa leh Khuangchera te entawntlak a tih thu sawiin, Mizoram pawh thang duang tak leh hmasawnna hmel thar hmu mek a nih thu a sawi.
Bairabi-Sairang Railway Line hawn a ni ta leh Kaladan Multi-Modal Transit Transport Project te chuan danglamna lian tak a chhuah dawn thu sawiin, tourism tihmasawn zui turin homestay, faina leh mikhual dawnsawn dan thiamna tihpun a tul thu a sawi a. Tualchhung tharchhuah – agriculture, handicraft leh handloom hmanga kuthnathawktuten hlawkna an hmuh zel nan market linkage nghet tak din a tul thu a sawi bawk.
Mizo thalai taima leh thil thiam zung zungte chu ram chhung leh pawnah inelna a tel tura chahin, Civil Service, IIT, IIM, Medical leh Defence-ahte tam zawk an luh a, tawnhriat leh hlawhtlinna an neih te Mizoram tana hawn turin a chah a ni.
Larsap chuan hmasawnna lo thleng mek rualin Mizoram hnam ziarang mawi leh khawtlang inlungrualna te humhalh tlat a pawimawh thu a sawi lang bawk.
He hunah hian Eklavya Model Residential School, Tlangnuam, Nuehof English Medium School, Aizawl bakah local artist ten Independence Day pualin cultural programme ngaihhlut hlawh tak tak an chhawp chhuak a ni.