Tunhnai a BJP tal buai vel chu India ram politics lam ngaihventute chuan an buaipui hle mai. Thalai rual thinlungah sawrkar laka helna rilru a piang a. Kil tin maiah nawrh inpeih rengin thalaite an inkau a. Sawrkar chetsualna thlir ranin, an thusawiah dikhlel nia an hriat chu an vawm let nghal awlh awlh zel mai. He helna rilru hi NEET exam zawhna lo put ru a awm vanga buainaah mi tam tak chuan an ngai a. Mahse hei hi ngaihdan pawnlang tak a ni.
India ram hi BJP in an kaihhruai hnuah nasa taka thang angin an inlantir a. Sawrkar hmalakna puan darh lamah an chak em em mai a. Chak anga lan an duh avangin an tih bak leh tih hauh loh thlengin dawt hmangin mipui an bum a. Ram hmasawnna chu a taka thleng silovin khawvel mit hmuhah ram ropui ber angin an chhuah a ni. Hmasawnna lama data an siamte chu a lem vek hi a ni ringawt a, mahse a tak ram ni lo, a lem hi chu a nihna lan chhuah hun hi a awm lo thei lo. Hun a kal zel a, ram mipuite chu an lo harsa ta tak tak a, thalaite tan hna a vang em em a, kil tinah thalai lehkhathiam hna hmu lo thinrim an lo pung chho ta ruih ruih a, kumtinin thalai lehkhathiam maktaduai tel hna hmu lo an lo pung chho ta.
Chung thil chu mawi taka ram hmasawnna an sawi nen chuan khaikhin in lungawina reng reng a awm thei ta lova. India ram dinhmun chu tlangkang la rawn invawrhchhuak chiah lo angah a ding a ni. Chutih laiin NEET exam zawhna leak chuan harsatna inthuahthip tup mai chu vawilehkhatah a lo tipuak darh ta a ni ber mai.
BJP hian ram mipui an bum a, anmahni tana hnawk hlek chu bei let chat chatin an chhu chhe zel a. Politics a an hmelma te chu a remchan dan ang anga jail-ah te khung zelin an kal a ni. Mahse, he democracy ram mihring chitin reng awmnaah hian mipui an up bet seng ta lo.
Kan ram lam kan thlir chuan Mizoramah pawh hian hmasawnna duhin mipuiin beiseina sang tak nen sawrkar lokal tawh thinte khawp kham lovin sawrkar thar kan siam a. Kan sawrkar thar pawhin mipui hnenah thu tha tinreng min tiam a. Tunah hian kan enchhin mek a ni. Mahse, tunhnai boruakah chuan beisei an pha dawn lo a ang ta khawp mai. Kumhnih leh a chanve hun an hmang tawh a. Thil thar engmah hmuh tur a la awm lova, sawrkar kalphungah tih dan hlui party mite duhsak a, contact hna inpek velah an buai chho leh chu a ni mai a. VIP culture nuai bo tihte chu a rikin a ri chhin ta lova, kan kal danah chuan BJP in mipui a bum kan tih ang deuh tho a lo ni chho tan ta!. Kan sawrkar hian kumhnih chuang hun an la nei a, insiamthatna hun erawh an la nei. He hun tha an la neih hi hmang tangkai sela, democracy ram kan nihna angin nakin lawkah kan inthlang leh dawn a, an sawi ang ngei hian ram hmasawnna hawi hian ke min pen pui sela a va tha dawn em. Central politics a lungawi lohna lut laklawh ang hi thleng lo hram teh se.