Philippines chhim lama Catholic junior high school-a kai chu a zirlaipuiin a kap hlum a, amah pawh a inthat zui tih tual chhung thuneituten Thawhlehni khan an sawi.
A kaptu nia sawi hian Zamboanga City khawpuia an sikulah hian .45-calibre pistol a keng lut ru niin Mayor Khymer Adan Olaso-a’n a sawi.
Dawhkan bula thu an zirtirtu a kap hmasa a, a thelh hnuah classroom dangah tlan lutin zirlai pakhat a kap a, a hnuah a thi zui ta tih Olaso-a hian a sawi.
Thil thleng lai video nia sawi chu tual chhung chanchinbuten an tichhuak a, hetah hian mi pakhat, a kaptu nia hriat hian silai ngul ni awm tak kenga sikul hallway a kal lai pawh a lang tih AFP News Agency-in a tar lang.
He thil thlang hi ram laili, Tacloban City-a high school thova inkahna, zirlai pathum thihna leh mi 20 an hliam phahna thlen hnu thla hniha thleng a ni.
Hemi tuma mi kaptute hi rawlthar pahnih niin pakhat zawk hi tharum thawhna lan tamna online game khel nasa tak nia sawi a ni.
Sandbox game pakhat, Gorebox hi Philippines-a khelh khap niin Senate chuan tharum thawhna lan tamna computer game-in thalai zawkte nun a nghawng dan zir chianna tur a pawm bawk.
Asia chhimchhaka thuneitute chuan naupangte tana social media hman pawh khap an rilruk a, a tha lo zawngin nghawng a nei thei niin an ngai a ni.
Tun thla tir khan Thai rawlthar pakhatin an sikulah naupang pariat a kah hlum hnuah amah a inthat tawh bawk a. Thuneitute chuan social media-ah tharum thawhna lanna a en nasa thin tih an sawi.