Indian driver kum 11 mi, Atiqa Mir-i chuan international motorsport huangah hming a chher mek a, European karting-a a thiamna chungchuang tak leh a thil tihhlawhtlin tharte avangin khawvel motorsport pawl pui ber, FIA chuan an fak hle.
FIA chuan Indian racer Mir-i thiamna danglam tak chu fakin he infiamna kalphung hi an duang thar mek niin an sawi a. F1 Academy thlawpna hmu hmasa ber, Mir-i hi tunah hian Europe-a karting series hrang hrang, kum 12-14 inkar pawlah driver tawn hriat nei zawkte hmachhawnin a tlan mek a ni.
Mir-i thil tum ber chu kum 1992 hnuah hmeichhia an la tlan leh miah lohna F1 luhchilh theih a ni.
“Atiqa Mir-i ang arsi êng chho mekte hian motorsport hmakhua an siam thar mek a, a hlawhtlinna tharlamte hian kan infiamna hmakhua a ênzia a lantir a. FIA member club, Western India Automobile Association atanga thlawpna tha tak nen Atiqa hian MENA Karting Championship Nations Cup-ah an ram ai a lo awh tawh a, tunah chuan professional racing kawng a zawh chhohna turin international FIA Karting inelna hrang hrangah a tlan tan mek a. Atiqa, i hlawhtlinna kan lo thlir chhunzawm zel ang,” tiin FIA chuan thu an chhuah.
May thlaah khan Mir-i hian Greece-a Champions of the Future Academy Round 2-ah chanchin thar siamin hlawhtlinna a lo chang tawh a. Tun kar tir lamah khan Sweden-a FIA European Championship round-ah Top 10 thleng thei Indian naupang ber a lo ni tawh bawk.
Thla hmasaah khan Mir-i hian Italy-a Champions of the Future Academy series Round 3-ah Mercedes junior Niccolo Perico khumin pole position a chang a, mipui mit a la hle a ni.
FIA pawhin a chet that dan hi an lo hmuh hmaih bik lo a, “Italy-a Champions of the Future Academy Program-ah khan India atanga kum 11 mi, Atiqa Mir chuan tha chungchuang a nihna lantirin pole position a chang a, khawvel huapa inelna sang takah event record thar a siam a ni,” an ti.