Aizawl: Mizo Zirlai Pawl (MZP) General Headquarters hruaitute chuan an president, Dr. C. Lalremruata hovin Zirtawpni tlai khan Chief Secretary Khilli Ram Meena chu a pisaah an hmu a, MPSC siam that hnatlang an koh chhan leh central agency (ED, NIA, Income Tax) ten Mizoram Police-te hriatpuina tel lova hma an lak dan duh lohnate an thlen.
An inkawmnaah Chief Secretary chuan thalai hna zawngte beiseina leh MZP thil phut chu thil awm tak a nih avangin sorkarin reform committee a din thu a sawi a. Committee-ah hian senior officer-te an tel avangin zirlai pawlte chu ring ngam turin a chah a, MPSC leh a kaihhnawih pawl hrang hrangte ngaihdan lak zui a nih tur thu a sawi.
Hemi chungchangah hian MZP pawhin committee hnenah rawtna an thlen tur thu sawiin MPSC siam that duh zawng zawngte pawh rawtna thlen turin an chah nghal a ni.
Mizoram chhunga central agency hrang hrang – Enforcement Directorate (ED), National Investigation Agency, Income Tax hmalakna chungchangah MZP hruaitute chuan dan anga hmalakna thlawp viau mah se, local police hriatpuina tel lova mipui leh sumdawngte tithlabar zawnga hma an la thin chu ram leh hnam tan a him lo va, a thleng nawn tawh tur a ni lo tiin hma laksak turin an ngen a. Chief secretary pawhin he thil hi thuneitu sang zawk leh central agency hotute hnenah a thlen tur thu a tiam bawk.