Chief Minister Lalduhoma’n Tawngtai Bethel Camping Centre (TBCC), Sakawrtuichhuna Bana kaih (Handholding) Scheme hmanga camping centre sak, camper mi 80 atanga 90 leng ‘Jesaia Room’ a hawng a, ruihhlo avanga hliam tuarte chhawmdawl leh a hnu lama eizawnna bultanna pek chu sorkarin a ngaihpawimawh hle thu a sawi.
Inrinnia hawnna inkhawmah chief minister chuan kum 2023-a lak luh a nih hnua tlawh hmasak ber chu TBCC a nih thu sawiin tun hi a vawi thum tlawhna a nih thu a sawi a. TBCC hmasawnna hmuh a nuam a ti tih sawiin sorkarin sum a neih ang angin ruihhlo ngaite chhawmdawl hna a thawk reng tih a sawi.
He hmalaknaah hian Central YMA nen an thawhhona tha a tih sawiin lawmthu a sawi a. TBCC-a thawktu tlem tein camper mi 805 zet an enkawl thei chu ropui a ti a, Aizawl tan TBCC chu thil pawimawh tak a nih thu a sawi bawk.
Lalduhoma chuan lung in tang zinga zaa 98 chu drugs leh a kaihhnawih avanga tang an nih thu leh zaa 41-te chu tang nawn an nih thu a sawi a. Ruihhlo sim tawhte chu Hulhliap Short Stay Centre kaltlanga skill training pein Bana Kaih Scheme hmangin eizawnna bultanna pekah sorkarin tan a lak thu a sawi a. Kohhran, khawtlang leh NGO-te thawk ho zelin ruihhlo ngai enkawlna leh aftercare facility-te din zel a tul thu a sawi a, kohhran nen thawhhona siam zel a duh thu a sawi bawk.
Central YMA President R. Lalngheta pawhin camper-te chu an chhuah hnuah veng YMA-ten an lo lawm dawn tih sawiin nunna thar nena chhuahsan ngei turin a chah.
TBCC founder TT Zohmingthanga chuan pindan tharte a awm tak si-ah chuan damlo tam zawk enkawl theih a nih phah dawn thu a sawi.
Jesaia Room hi Rs. nuai 14.58 senga sak zawh a ni a, March thlaa Rs. nuai 13.82 senga sak, Mosia Room hnua sak a ni a. Sum hi sorkarin a tum a, Central YMA-in a buaipuiin camper-ten tha an thawh bawk.
Inkhawm hi Central YMA Vice-President Prof. Lalnuntluanga’n a kaihruai a, CM Adviser Lalmuanpuia Punte pawh a tel a ni.