Aizawl: DM&R Minister Prof. Lalnilawma’n Tlangnuam PHE tanky thlanga lei min thleng chu a hmunah kalin Zirtawpni tlai khan a endik a. Lei min hian tanky a khawih pawi dante leh a chhehvel venhim dan tur thuneitute leh khawtlang hruaitute nen an sawi ho nghal.
Tlangnuama PHE tanky lian hi August 20, 2026 zan lama ruah sur nasa avangin August 21, 2026 chawhma dar 9:30 vel khan a min a, kawng metre 50 vel a hnawh ping a ni.
Lei min hian a chhak kawng pheia tanky bul lawkah lei khi lian tak a siam bawk a. Hemi avang hian chhungkaw khat, Lalhmangaiha te chu an inthiar chhuah a ngai hial bawk.
Lei min a thlen hian local council bultumin hnatlang koh nghal niin a theih ang angin kawng leh a chhehvel thian fai hna hi chhun lamah thawh a ni a. Bialtu MLA leh corporator-te pawhin lei min hi an hriat ve leh a hmun hi an thleng nghal bawk.
Prof. Lalnilawma hi bialtu MLA Lalchhuanthanga, Corporator Dr. Lalmalsawma Nghaka, PHED E-in-C Zodinthari, EE Lalzuimawii, ADDMA Zonal Officer K. Lalkroschhuanga, Assistant Commissioner Hmingmawizuala, Geology & Mining Senior Geologist Benjamin Roluahpuia, local council leh khawtlang hruaituten an tawiawm a. Anni hian PHE hotute nen tanky hi hman zui zel dan tur leh venhimna hna thawh dan tur hrang hrang an sawi ho zui bawk a ni.