Diego Maradona-a’n 1986 World Cup-a a larpui, ‘hand of God’ goal a thunna football chu lilamnaah £ maktaduai 2.5-in an hralh.
Maradona hian quarter-final-ah goalkeeper Peter Shilton-a nen boruaka ball a awm chu inchuhin a kutin a ben luh khalh zauh va, 2-1-in Argentina chuan England lakah hnehna an chang.
Inkhelh zawhah thuthar lakhawmtuten an kawmnaah goal chu ‘Maradona lu tlem leh Pathian kut tlem ( little with the hand of God) nen’ a thun a nih thu a sawi zui a. Hei vang hian he goal hi ‘hand of God goal’ tia hriat zui a hlawh ta a ni.
He goal sawi hlawh tak a thun bakah hian Maradona hian he inkhelah hian ‘goal of the century’ tia hriat zui ni ta a thun bawk a, England player panga zet a paltlang hnuah Shilton-a thlenga bumin goal ropui bik a thun a ni.
Ball hi $ maktaduai 3.3 (£ maktaduai 2.5)-in United States-a Heritage Auctions-in Inrinni khan an hralh a, an rin dan chuan $ maktaduai 10 (£ maktaduai 7.3) dawna an hralh theih an inbeisei zawk a ni.
Lilam hmain Heritage-a specialist auctioneer Mike Provenzale chuan Reuters hnenah, “Thil hlu bik pakhat a ni a. Football khawvela thil hlu bik tak a ni,” tiin a sawi.
Kum 1986 inkhel hamtu, Tunisian Ali Bin Nasser-a’n Adidas Azteca ball hi inkhelh zawhah lain kum 30 chuang a kawl.
Kum 2023 khan ball hi kha inkhela hman ngei kha a ni tih ziahna lehkha a siam a, a hnuah a ni ngei tih pawh finfiah zui a ni bawk.
Bin Nasser-a hian ball hi kum 2022 khan $ maktaduai 2.37 (£ maktaduai 1.74)-in a lo hralh chhawng tawh a. A neitu thar hian kum 2023 khan lilam tur thovin a chhawp chhuak a; mahse, a chhan theihna hniam ber pawha chhangtu an awm loh avangin an hralh ta lo thung.
Kha inkhela Maradona hak kawr pawh kha kum 2022 khan lilam tawh niin £ maktaduai 7.1-in hralh a lo ni tawh bawk.