Aizawl: Centre for Environment & Social Justice (CESJ) Mizoram chuan sorkarin sum tam tak senga thing a phun, puitling tawh tam tak a ruka kih leh ruk bo thin a ni chu pawi an tih thu sawiin, heng venhimna hna thawk tha lo leh timber mafia-te nena inthuruala mawhphurtute zawng chhuaka hrem nghal turin Mizoram sorkar an ngen.
CESJ thuchhuah tar lan danin, hun rei tak atang khan Mizoram hmun hrang hrangah Forest department-in thing hralh kal chi (commercial trees) a phun thin a, Reserved Forest ami te hial pawh mi mal kuta awm ta leh Revenue department-in Land Pass an pek zui mai te pawh an awm a. Kum 4 leh 5 kalta atang phei khan Kawrthah leh Mamit Forest Division huam chhunga sorkar Teak phun puitling tawhte chu a ruka kih a, Transit Pass tel lova phurh chhuah theih a nih loh avangin mi mal Felling Permit neitute thing kara zep ru-in state pawn lamah te phurh chhuah a ni thin a, a then erawh mi mal Saw Mill-ah te hralh an ni bawk. Heng thilte hi thil fel lo tak leh Mizoram thing mamawh zaa 80 phuhruk tura ruahman tawh lo tichhetu a nih avangin sorkarin a hmunah finfiahna nei a, a tisualtute chungah dan anga hma a lak a tul thu an tar lang
CESJ chuan Reserved Forest pawn lamah mi mal thing kih phalna pek a nih dawnin, Forest Field Staff-ten thing kih atanga phurh chhuah thlenga an vilzui theih chin chauh pek tawh an phut a. Licensed Saw Mill te thing lei zat, zai chhuah zat, leh stock la awm te pawh Saw Mill Rules-in a phut angin endik ziah te, sorkar thing phun puitling tawhte hi a bo mai loh nan leh Mizoram thing mamawh phuhruk nana hman a nih zui theih nan, Working Plan siama dan ang thlapa seng thin turin an phut bawk.