Kar hmasaa sabereka khuangkaih thawkin a dan nia sawi, hydropower project-a leiverha tangte chhanchhuah tumin Nepal-a rescue team-te chuan Chinese leh Indian mi thiamte puihna nen an bei mek.
Himalaya tlang panga sabereka khuangkaih thlengah hian Nepal nena an inrina bawra khaw tam tak a tichhia a. Mi 900 chuang thi awm tawhin chin hriat loh mi 5,000 dawn an la awm.
Tui lianin a lak ruang tam tak chu phaizawlah hnawl karah tangin an tawih tan mek.
Nepali thuneitute chuan a tuar ber district pahnih, Rasuwa lehNuwakot-a hydropower project 11 zeta tang nia an hriat mi 933-te chhanchhuah an tum mek tih an sawi a, heng zinga a zahve chuang hi lei verha tang niin an ngai.
Thlalak leh video thehdarhah chuan rescue team hian lei khawihna khawl hmanrua bakah suahdur nen thim hnuaiah chirh leh lung te an thian a. Sipaiten torchlight nen leiverh pakhat chu luh theihna kua a awm em tih an dap lai a lang bawk.
Nepali sipaite hian search-and-rescue team-un lung halna thunun theih chi te, excavator leh searchlight nen tui leh chirh hi an thian tih an sawi a. Leiverh pahnih luhna bu maiah ruang pathum an hmu tawh a, mi dangte an la zawng mek tih an sawi.
“Hnawl a chhah em em a, leiverhte hi lut thei tura tihkuak chu hna hautak a ni,” tiin Nepal sipai thupuangtu, Raja Ram Basnet-a’n Reuters a hrilh a. “Kan tum ber chu leiverhte hi hawn a ni,” a ti.
Thawhtanni thleng khan Nepali thuneitute chuan Nilainia chhiatna thlenga thi hi mi 903 an ni tawh a, chin hriat loh 4,247 awmin heng zinga 933 hi hydropower project-a thawkte an ni tih an sawi a. Chinese ram lamah thuneituten Gyirong County-ah mi 16 thiin chin hriat loh 546 an awm tih an sawi.
Red Cross chuan chhiatna thleng hi mi 90,000-in an tuar niin a chhut a ni.