Aizawl: Mizoram Journalists’ Association (MJA)-in an sawm angin Rajya Sabha MP K. Laltluangkima’n Thawhtanni khan Aizawl Press Club a tlawh a, he huna an inkawmnaah MP-ten mipui dawnsawnna tur office leh quarters mumal tak an neih loh chu tha lo a tih thu sawiin hemi chungchang hi chief minister pawh a lo sawipui tawh thu a sawi.
Aizawl Press Club Conference Hall-a inkawmhona hi MJA President Vanlalrema Vantawl-in a kaihruai a, MJA General Secretary K. Zothanpara’n inhmelhriattirna hun a hmang.
MP chuan MJA-in pawl zahawm tak a nihna a kengkawh zel chu lawmawm a tih thu leh ram tana rawngbawlnaah thawh hona tha tak neih zel a beisei thu a sawi.
K. Laltluangkima chuan Mizoram mamawh hmasak ber chu kawngpui tha neih a nih thu sawiin, Mizote danglam bikna (uniqueness) hmang tangkaia khualzin hip kawnga tan lak a pawimawh thu a sawi a. Chutih rualin MP-ten ram leh hnam tana hna an thawh thin avangin kum upat lutuk hmaa MP nih thei dan awm se a duh thu leh, Mizoram mipui aiawh te tana pisa leh quarters sak a nih theih nan sorkar laipui thlenga hma lak a tum thu a sawi bawk.
Mizoram hnufualna chhan tam zawk chu hnathawh phung leh enkawl zui zelna (maintenance) that tawk loh vang a ni tiin, ZPM sorkarin hnathawh endiktu tur a din chu fakawm a tih thu a sawi. Mizoram chu ziak leh chhiar thiam tamna leh corruption tlemna state a ni hi lawmawm ti hle mah se, cancer natna a hluar lutuk erawh thil pawi tak a nih avangin zuk leh hmuam laka insum a tan lak a ngai a ni tiin a sawi.