Silchar Truck Driver Association chuan an member-ten Mizoramah harsatna hrang hrang an tawh chungchangah an beisei anga hmalakna a awm loh avangin Thawhtanni zan dar 6 atang khan Mizoram panin an lirthei an tlantir duh rih lo.
Silchar Truck Driver Association thuchhuah tarlan danin tun hnaiah an member-ten Mizoram chhungah harsatna hrang hrang an tawk thin a. Thla kalta atang khan Assam registration nei lirthei, balu phurten Kolasib district chhungah harsatna an tawk a; dan ang thlapa balu an phurhte chu kawng lakah mi thenkhatten tidingin an buntir hnuah a ruakin Assam-ah an hawtir leh nia sawi a ni. Hei bakah hian driver-te chuan vau mai bakah inhnuaichhiahna leh intihduhdahna an tuar nasa hle tih sawiin, an dinhmun a him lo hle tih an tar lang.
Hemi chungchangah hian association chuan Mizoram sorkar leh Kolasib DC-te chu thil awmzia chhui fiah turin an ngen a. Hetianga lirthei dan leh endik hi sorkar dan anga kalpui a nih leh nih loh puangzar tur leh dan zawm dan tur hrilhfiah turin an phut a. Sorkar hriatpui leh dan anga kalpui a nih loh chuan driver-te himna tura hma la vat turin an ngen bawk.
Silchar Truck Driver Association chuan hemi chungchangah Mizoram leh Assam chief minister ve ve bakah Kolasib leh Cachar bawrhsap hnenah ziakin an theh lut tawh a. Amaherawhchu, an thil phut chungchangah hian state pahnih sorkar atangin hmalakna leh an harsatna sutkianna tur lam engmah an dawn loh avangin Thawhtanni zan dar 6 atang khan Silchar Truck Driver Association thutlukna angin driver-ten Mizoramah an tlan duh rih lo a ni.
Hetih lai hian kawng lakah lirthei mi dang dan tuma kawng dang pawh an awm chuang lo va, hriat theih chinah he nawrhna avang hian harsatna leh buaina dang thleng a la awm lo a ni.