Aizawl: Mizo Zirlai Pawl (MZP) chuan kum 2015 atanga an kalpui tawh, ‘Hnam dang nupui pasal nei lo tura inzirtirna ni’ chu Nilaini khan an hmang a. An hruaitute insem darhin Aizawl chhung sikul parukah leh district hrang hrangah zirlai naupangte fuihna leh inzirtirna hun an buatsaih.
MZP hruaitute chuan Mizote hi chimral tham lek khawp a hnam tlem an la nih avangin inneih pawlh hi hnam tlem zawkte boral chhan awlsam ber a nih thu an sawi a. Hnam dangte chu thianah siam thin mah se, ram leh hnam humhalh a boral loh nan nupui pasal atan erawh mahni hnampui ngei thlang turin zirlaite an chah.
State thenawm Tripura-a a ram neitu indigenous people-te chu minority-ah chang tawhin hnamdang thuhnuaiah an kun mek a nih thu an sawi a. Mizoram pawh hetiang dinhmun a thlen ve loh nan inzirtirna hi zirlai leh nu leh paten inchhung atanga an tan a pawimawh thu an sawi bawk.
Sikul hrang hranga hun hmannaah hian Mizo hmeichhiain hnam dang pasal a neih chuan a faten a pa hnam an chhawm tawh avangin Mizo an ni thei tawh lo va, ‘The Mizo Marriage & Inheritance of Property (Amendment) Act, 2026’ hnuaiah pawh chiang taka tar lan a nih angin Schedule Tribe certificate leh hamthatna dang an chang thei tawh lo tih an hrilh a. Hemi rual hian Mizo zirlaite chu zirtirtu leh hotute zahna, tlawmngaihna leh rinawmna zirtir an nih bakah IAS, IPS leh exam lian zawka Mizo thalai an tling tlem ta em em chu pawi tiin zirna kawnga tan la sauh sauh turin leh, Mizo mipate pawh ruihhlo bawih a tang lo tur leh Mizo hmeichhiate tana neih tlak leh innghahna tlak nih tum theuh turin an fuih bawk.