Tun hnaiah Thinghlun, Mamit District lamah Assam in kan ramchhung ngeiah kut thlakna an nei niin sawi a ni a, finfiah zui a, kan ram kan humhalh nat zual a tul hle.
Muangleia kan awm lai hian kan chhehvel hnamte hian state hran atangin min lo nek leh thin a, kan ram chin humhalh tur hian dawih aw kan chhuah thiang lo a, mizopa hian hnungtawlh a tum tur a ni hek lo.
Hun hmasa lamah ramri buaina avangin Assam nen nasa takin kan lo inngur tawh a, silai hial lo puak tawhin, khatih laia sorkar-na chelhtute kha an fakawmin, an huaisen hle.
Kan thenawm state te hian kan ram hi min chuhpui an tum tawh lo a ni lo a, kan inrin loh lai hian chetchhuah an inpeih reng tih hriat tur a ni a, sorkar pawh hian chu chu a hriat a, huaisen taka kan hmaa mihuai kaltate sulhnu kha an zui ngam ve tur a ni bawk.
Innghirngho leh inrem lova awm hi a tha lo tih kan hre vek a, inngeih tlang taka awm kan duh a nih pawhin kan ram chhan nan chuan sorkar hian tu state hotute mah a tlawn tur a ni lo a, dawih aw a chhuah tur a ni hek lo. Kan dinna ngaia ding a, kan ram chin humhalh tlat turin huaisen takin inremna a zawng zawk tur a ni.
Tuna Assam lamin min nekna nia lang pawh hi enfiah thuai ni thei se la, sorkar hian a tul angin a mite thlamuan tur leh enfiahpui turin ruahmanna siam thuai teh se.