Aizawl: Thawhtannia Special Summary Revision (SIR) 2026 Final Electoral Rolls tlangzarh turah tlawmngai pawl leh political party ten sawisel tur nei lo.
District Election Officer (DEO) leh District Bawrhsap Er. Lalhriatpuia kaihhruainain DC Pisa Pui Hall-ah Special Summary Revision (SIR) 2026 Final Electoral Rolls, Thawhtannia tlangzarh tur chungchang leh a kalpui dan thlirletin Zirtawpni khan an thukhawm.
He inkawmhonaah hian Tlawmngai pawl leh Political party aiawhte chuan SIR 2026 Final Electoral Rolls felfai leh thianghlim tak, a hun tiam chhunga tlangzarh a nih theih nana DEO, ERO, AERO, BLO leh BLA-te inpekna leh thawhrimna zawng zawng chungah lawmthu an sawi a. Local council, village council leh official-te thahnemngai taka an thawhhona zarah leh SIR 2026 official-ten tha taka an hna an hlen chhuah avangin sawisel tur an neih loh thu leh an lawmpui tak zet thu an sawi bawk.
Political party aiawhte chuan SIR 2026 hi Mizoram hmalam hun atan thil pawimawh tak a ni tih hriaa, political party zawng zawng te lungrual taka an thawk ho thei chu thil lawmawm leh chhinchhiah tak a nih thu an sawi.
DEO Er. Lalhriatpuia pawhin thu sawiin, Aizawl district hi SIR neihna kawngah district dang aiin mihring cheng an tamin, Assembly Constituency tam mah se, election official-te leh BLO/BLA-te inpekna leh thawhrimna avangin a hun takah Final Electoral Rolls tlangzarh a ni theih tur chu lawmawm a tih thu a sawi a. He hlawhtlinna hi tlawmngai pawl, LC/VC leh MJA-te thawhpui leh puibawmna zar liau liau a ni tiin lawmthu a sawi a ni.
Thutkhawmah hian SIR Official te leh Recognized political party, Central YMA, MUP leh MHIP aiawhte an tel.