Aizawl: UDPA Department bultumin Joint Coordination Committee hnuaia Central YMA, Aizawl Municipal Corporation (AMC) leh Aizawl Smart City Ltd. te thawhpuinaa buatsaih ‘Aizawl City Branch Fai Inelna 2026’ chu Thawhtanni atang khan Aizawl khawpui chhung YMA Branch hrang hrangah endik hna thawh tan a ni.
He faina intihsiakna hian a tum ber chu Mizoram faina lama a hmasawn zel nan leh mi tin ten fai taka nun an hmanna tura YMA Branch hrang hrang te, tualchhung Kohhran leh pawl hrang hrang te nen hma an lak ho theihna tur a ni.
Endiktu (panel of judges) Romalsawma Hmar, K. Zothanpara leh Dr. Gospel Lallawmzuali te chuan Thawhtanni zing atang khan veng fai dan an endik tan a, Branch tinte hi vawi hnih theuh endik an ni dawn a ni.
Endik thawh khatna hi September atanga December 2026 chhunga neih tur niin, Judge-te hian YMA Branch zawng zawng tlawh chhuakin veng chhung hmun hrang hrang an en dawn bakah YMA hruaitute an kawm dawn a ni.
Endik thawh hnihna erawh January atanga March 2027 chhunga ‘surprise visit’ a neih a ni dawn a, he tiang hunah hian Branch hruaitute hrilh lawk lovin an tlawh tawh thung ang.
Faina intihsiakna kal mek a lawmman atan hian pakhatnaah Rs 3,00,000, pahnihnaah Rs 2,00,000 leh pathumnaah Rs 1,00,000 ruahman a ni a; a ti tha zual Top 10-a langte hnenah Rs 50,000 theuh pek an ni bawk ang.
Faina hi intihsiaknaa tawp mai lo va, hun kal zelah mipuite nunpui tura inzirtirna neih chhunzawm zel chu he hmalakna hian a tum ber a ni.