Aizawl:Assembly Deputy Speaker Lalfamkima chuan Nilaini khan Mizoram Governor General (Dr) Vijay Kumar Singh chu Raj Bhavan-ah hmuin, Vairengte atanga Sihmui panna kawng siam that leh Kawnpui atanga Aizawl panna kawng zauh chungchang a sawipui.
Deputy Speaker hian thal intan ruala kawng siam chak taka tan a nih theih nan central sorkar atanga sanction pawimawhte nawr chhuahsak turin larsap hi a ngen a.
Vairengte leh Sihmui inkar kawng chhe zual lai, tui putin a tihchhiat thinte siamthat nan PQC (cement a chhun) hmang tura NHIDCL-in ‘Change of Scope’ an siam, Delhi lamin ‘in-principle’ a an lo pawm tawh chu hna tan a nih theih nana sanction hmuh a nih a pawimawh thu a sawi.
Larsap chuan a ngenna hi lo ngaipawimawhin, chawlhkar thara Delhi a kal hmasak ber hunah theih tawpin hma a lo lakpui tur thu a lo hrilh a ni.
Hei bakah hian Kawnpui atanga Durtlang kaltlanga Aizawl panna tlang kawng pawh double lane-a siam a nih theih nan sorkar laipui hotute hnena nawrpui turin Deputy Speaker hian a ngen nghal bawk.
Larsap pawhin Aizawl khawpui luhna leh chhuahna kawng hi pakhat chauh rinchhan lova kawng pahnih tal a awm a pawimawh tih a lo pawmpui a, he kawng zauh tura ngenna hi theih tawpa a lo bawhzui tur thu a sawi bawk.