Aizawl: Rural Development & Administration Minister Prof. Lalnilawma chu thalaite chu hna zawngtu chauh ni lova mi dangte tana eizawnna siamsaktu (entrepreneur) nih tum zawk turin a chah.
Nilaini khan Ministry of Micro, Small and Medium Enterprises (MSME), PHD Chamber of Commerce & Industry, leh Mizoram sorkar tangkawpin an buatsaih ‘Entrepreneur Awareness & Special Vendor Development Programme’ chu I&PR Conference Hall, Treasury Square-ah neih a ni a. He hun hmanpuitu Minister Prof. Lalnilawma chuan, khawvel thang zelah entrepreneurship chu sorkar inrelbawlna kawngah leh thalaite cho phurna atan hmanraw pawimawh ber pakhat a nih avangin, NSSH hnuaia scheme hrang hrangte chu tangkai taka hmang tura kalkhawmte fuihin, workshop chhung zawnga mithiam te leh mi hlawhtling te hneng atanga a tam thei ang ber zir chhuak turin duhsakna a hlan nghal.
National Scheduled Caste & Scheduled Tribe Hub hi sorkar laipui chuan October 2016 khan Ministry of MSME hnuaiah ram chhunga SC leh ST entrepreneur-te puih nan leh tihchangtlung nan a lo din a ni a, nimin thlengin sorkar leh mi malin an hman tangkai hle a ni.