Aizawl: Art & Culture Minister C.Lalsawivunga’n Ningani khan a piasa-ah T.C. Vanlalzauva siam short film ‘Who are you going to be? (Eng mi nge i la nih dawn?)’ tih chu a tlangzarh a; he huna a thu sawiah ruihhlo leh zuin hnam leh chhungkua a tihchhiat mek avangin hemi do kawngah hian chhung tin tan rual a tul tak zet tih a sawi.
Minister chuan kum 1983-a Mizo film hmasa ber a lo chhuah atanga tun thlengin film industry a thang nasa hle tih a sawi a. Ruihhlo laka chhungkaw tin zirtirna pe thei leh Mizo nunzia phawk chhuak thei film thar a lo chhuak leh ta hi lawmawm tiin, Zofate tana hlawk taka a thawh a beisei thu a sawi bawk.
He film-ah hian Mizoramin a buaipui leh manganpui ruihhlo hrang hrang avanga thalaite tan retheihna leh kohhran leh mipui zawng zawng mawhphurhnate tar lan a ni.
He film hi Tribal Research Institute (TRI), Art & Culture Department sponsorship hnuaia siam a ni.
Inkhawm hi Rosila Tlanthianghlimi’n kaihruaiin, Mizoram Film Forum (MFF) Sr. Vice Chairman Lalawmpuia Khiangte, Art & Culture Director Carol V.L.M.S. Dawngkimi leh departmental official te bakah film mi thahnem tak an tel a ni. Film siamtu T.C. Vanlalzauva (Orientation Media) chuan lawmthu sawiin, film industry-a sulsultu leh inhmang hranghlui mi 11-te hnenah chawimawina a hlan nghal bawk.