US Consulate Kolkata chuan Nilaini zan khan Hotel Regency, Aizawl-ah Dr. Vanlalsiama Chhangte, Medical Director, Ebenezer Medical Center hnenah ‘Citizen Liaison Volunteer of the Year Award’ an hlan.
Ebenezer Medical Centre thuchhuahin a tar lan danin, he award hi Warren Newton, Vice Consul-in a hlan a ni a, US Ambassador to India Sergio Gor-a sign certificate leh memento te a tel a ni.
Dr. Vanlalsiama Chhangte chuan he chawimawhna a dawn chungchangah, award hi ama pual mai ni lovin Ebenezer Medical Center pual liau liau a nih thu a sawi a. US Citizen damlo enkawlna kawngah Ambulance driver, nurse, doctor te leh hospital thawktute leh administration zawng zawngte tangruala theihtawp an chhuah tlan rah a nih thu a sawi bawk.
Dr. Vanlalsiama chuan Ebenezer Hospital tum ber chu ‘Damlo enkawlna hmanga mi nun thlak danglam’ a nih thu sawiin, damlo rethei leh hausa, ram chhung mi leh ram dang mite tan pawh enkawltu nih chu an mission a nih thu a sawi.
Award hi December 1, 2025-a Myanmar-a rahpuah bomb rapa chesual, USA citizen Collin Mayfield-a Mizorama hruai luh a, Ebenezer Medical Center-a an enkawlna avanga hlan a ni.
Ebenezer Hospital-ah hian thla khat vel enkawl a nih hnuah Dr. Lalrinliana Varte, Orthopedic Surgeon-in a zai a, dam leh himin hruai haw a ni.
He award hi India ram chhunga dawng hmasa ber leh US Consulate Kolkata-in hetiang chawimawhna an hlan vawi khatna nia sawi a ni.