Aizawl: Mizoram Police te chuan ni thum kalta (September 7-9, 2026) chhung khan Champhai, Saitual leh Kolasib district-ah te Methamphetamine, Heroin leh Kuhva ro thahnem tak an man a, hemi kaihhnawihah hian mi paruk leh lirtheite an man.
Champhai Police-te chuan September 9, 2026 khan Chalbawia Junction, Khankawn Police Checkgate-ah random checking neiin, Maxi cab passenger Hrang Thawm Hnim (39), Sathmuhzung, Myanmar kut atangin Methamphetamine gram 994 (Rs 79.52 lakh man vel) an man a. Hemi zan vek hian Zokhawthar atanga Aizawl pan lirthei pakhat atangin Myanmar mipa pahnih Awngminnine (19) leh Bawithawng (18) te kut atangin Heroin gram 141 (Rs 28.20 lakh man vel) an man leh bawk.
Hei bakah Truck (MZ04/A-6929) atangin ram dang atanga lak luh nia rinhlelh permit leh license engmah awm lo Kuhva ro kg 3,360 (bag 42) an man bawk a ni.
Saitual District Police Special Team-te chuan September 8, 2026 khan Kualmawi, Keifang-ah Methamphetamine kg 12.746 (Rs vbc 10.19 man hu vel) chu Myanmar mi pahnih – Chinzalian (26) leh Thiankhatmuanga (27) te kut atangin an man.
Kolasib District Police, Phaisen Check Gate duty te pawhin September 7, 2026 khan Mahindra Scorpio (ML-04-E-3839) ringhlela an dapnaah Methamphetamine kg 3.910 (Rs vbc 3.2 man hu vel) hmuchhuakin, a phurtu Guljar Hussain (23), Karimganj, Assam chu an man bawk.