Aizawl: All Mizoram Petroleum Dealers Association (AMPEDA) chuan tihluihna hmanga petrol pump manager-te pawisa laksakah Mizo Zirlai Pawl (MZP) an puh a, zirlaite chuan tihluihna a awm loh thu an sawi ve thung.
AMPEDA chuan tun hnai lawka emergency meeting an neihnaah, an member zinga manager (hnamdang)-te chu MZP office-ah hren an nih thu leh, tihluihnain September ni 7, 2026 khan Rs. nuai 2 transfer tir an nih piah lamah pump hrang hrang atangin Rs. Nuai 1.2 dang transfer tura phut mek an nih thu an sawi a. Hetianga tih luihna leh hnathawk inhren sak chu pawi an tih thu sawiin, September 16, 2026 ral hmaa MZP-in pawisa an laksak te an pek let loh leh transfer tura an tihte an hnukdawk lo a nih chuan September 17, 2026 atangin Mizoram chhunga petrol pump zawng zawng tiam chin awm lovin khar an tum thu an puang.
Hemi chungchangah hian nimin khan MZP chuan thuchhuah siamin, tihluihna leh kut inthlakna a awm loh thu leh Darlawna September 23-25, 2026 chhunga MZP Assembly an neih tur atana sum an thawh zawk a nih thu an sawi thung.
MZP chuan Lalthanzauva ta ni thin, Haryana mi, Sandeep-a hnena hralh tawh, Keifanga LT Brothers Filling Station chuan sum hi an thawh hrim hrim a ni tiin, Mizo hming hawha hnam dangte petrol pump enkawltirtu Mizote hre vek tawhin a tul angin hma an la zel dawn tih an sawi.
MZP chuan AMPEDA-in petrol pump khar an tum a nih pawhin, hnamdang sumdawntir ve lo Mizo petrol pump neitute chu inkhar ve lo turin an ngen a. Mipuite pawh hnam dang sumdawn tirtute hnualsuat tura an ngen rualin, sorkar pawh dan dik lo hmanga sumdawngte dap chhuaka an license thiahsak turin an phut bawk.