Kum 2024 atanga kumin thlengin hriat theih chinah Mizoramah mahni intihlum mi 110 an awm tawh a. Kuminah pawh mi 32 an awm tawh.
Mahni intihhlum hluar zel laka invenna leh inzirtirna ni, World Suicide Prevention Day hi Ningani khan Chanmari YMA Hall, Aizawl-ah hman niin, Gauhati High Court Judge leh Mizoram State Legal Services Authority Executive Chairman ni bawk Nelson Sailo chuan khuallian niin a hmanpui.
SP Crime Branch tar lan danin kum 2024 khan Mizoramah mahni intihlum mi 46 (mipa 43, hmeichhia pathum) an awm a; nikum khan mi 32 (mipa 26, hmeichhia paruk) an intihlum leh a; kumin chhungin mi 32 (mipa 25, hmeichhia pasarih) an awm tawh bawk.
Kum 2024 atanga kumin thlenga mahni nunna la zawng zawng mi 110-te zinga 94 chu mipa an ni a, 16 chu hmeichhia an ni a. Heng zinga tam ber hi kum 18 atanga 30 inkar an ni a, a zawnin kum 31-45 inkar leh kum 46–60 inkar an tam ber bawk.
Mahni intihlumte zinga a naupang ber chu kum riat mi niin a upa ber hi kum 87 a ni.
World Suicide Prevention Day 2026 puala hun hman hi National Programme for Prevention & Control of Deafness State Consultant Dr. Lalthanmawii Khalthang-in a kaihruai a. Gauhati High Court Judge Kaushik Goswami, NHM Director Dr. Lalchhuanawma, Education Director Angela Zothanpuii leh National Mental Health Programme State Nodal Officer Dr. Robert L. Khawlhring te pawhin thu an sawi a ni.
Kumin hian ‘Changing The Narrative On Suicide’ tih thupui hmanga inzirtirna neih a ni a. Aizawl khawpui chhunga high school leh higher secondary school 19 te, college paruk atanga zirlaite telin, thupui awmsa hmangin mahni intihhlum dona leh a ven dan kawng hrang hrang sawia intihsiak buatsaih a ni bawk.