Aizawl: India leh MNF te inremna chu inremna them-lem mai a ni lo va, Mizo mipuite tawngtaina avanga Pathian malsawmna dawn vang a ni tiin MNF National Core Committee (NCC) K. Vanlalauva chuan Zirtawpnia MNF Hnam Run chhung inkhawmah a sawi.
Minister hlui K. Vanlalauva chuan Mizo ten zalenna an sual tirh te, kum 1965-a prime minister hnena memorandum thehluh leh 1966-a ram chhung rualrem lohna leh hrehawmna thlengte chhui kirin, lal lal lai atanga Mizo ten zalenna an lo duh tawh thinna chuan mipuite rilru a hneh hle tih a sawi a. Remna a lo awm a, kum 1986-a inremna thlen tirha Laldenga’n ‘Inremna chu a tawpna ni lovin a bul tanna zawk a ni a, nakinah he inremna hi ‘them-lem’ tia sawi an la awm ang,’ a lo ti tawh tih a sawi.
Kum 40 a liam hnuah inremna sawi nep tumtu leh sawi bawrhbantu an awm ta chu hnam hmuhsitnaa ngaih theih a nih avangin do tlang turin a sawm a; he inremna, Pathian malsawmna an neih chhun hi uluk taka vawnhim tur a nih thu a sawi bawk.