Aizawl: AH & Veterinary Department chuan Zirtawpni chhun khan State Vety Polyclinic Hospital Conference Hall, Khatla-ah SASCI Part-VIII chungchang inhrilhfiahna leh inzirtirna hun ‘Training & Orientation Programme on SASCI Part-VIII’ an hmang.
He hunah hian district hrang hrang atangin officer leh Paravet mi 165 an kalkhawm.
SASCI Part-VIII hnuaiah hian India rama state hrang hrangte tana inelna Category D-ah Mizoram chu awmin, ti tha ber hnenah Financial Assistance Rs vbc 100 pek a nih dawn avangin he lawmman tlin ngei tur hian department-a thawktute chu thahnemngai taka tan la turin fuih an ni.
Programme hi Director, AH & Vety Department Dr. Lalrotluanga’n a kaihruai a, AH & Vety Secretary Lalsangliana chuan khuallian niin thu a sawi a, ran vulhtute leh an ran vulhte chungah lainatna leh hmangaihna lantir fo thin turin a chah.
Lawmman Rs vbc 100 hi state tana chhenfakawm tak a nih avangin Bharat Pashudhan Portal-a data upload ngai te hunbi tiam chhunga upload hman ngei tura tan lak a pawimawh thu leh harsatna a awm pawha beidawng lova kawng dang dap zel turin a fuih bawk.
He hunah hian Joint Director (LH) Dr. Lalhlimpuii hnen atangin SASCI ruahmanna leh criteria chi ruk awmte ngaihthlak a ni a, Nodal Officer Dr. Thangzadinga, Dy. Director (LH) leh Dr. Ch. Lalthafamkima, Dy. Director (C&M) ten SASCI criteria point hrang hrang inzirtirna leh inhrilhfiahna hun an hmang nghal bawk a ni.