ZPM sorkar ruahmanna tam tak hi nakkin deuha a rah hmuh turte an nih hlawm vangin term khat mai lo deuh rorelna chan a ngai tih Chief Minister Lalduhoma’n a sawi.
Zirtawpnia Hnahthial Electric Veng GSA Hall-a South Tuipui ZPM Joint Block Conference a hmanpuinaah he thu hi sawiin, sorkar hmasawnna hnathawh rang taka puitling nghal tur a taka an kalpui tan tawh bawk thu a sawi a.
Chief minister chuan hmasawnna hnathawh chu chhawng thumah a then theih thu sawiin, short-term-ah chuan hmarcha, aieng, hmunphiah, sawhthing leh buh-ah te support price pein an leisak mek thu leh crop insurance an kalpui tan bakah ran lam insurance pawh tih tum mek a nih thu a sawi.
Medium-term-ah rubber mission, tung leh kuhva te chin uar a nih thu sawiin, long-term development-ah erawh mi tinin an chhawr tlan tura hmawrbawka North East Corridor Committee hmanga Thailand leh Burma ram kaltlanga kawng sial tum a nih thu leh, heng atan hian DPR siam chhung ringawt pawh hun a duh rei thin avangin an sorkar nawn a ngai tih a sawi.
Party mipuite hnena Lalduhoma chuan inthlan lehah mahni bial theuhah tlin tum turin a chah a, party mite vote ringawtin sorkar a din theih loh avangin party sorkar ni lova mipui sorkara an din reng a pawimawh thu a sawi bawk.
Mizoram history-ah party mite invulh uchuak taka induhsakna avangin ruling party te an tluk thin thu sawiin, “Induhsak dan tawk thiam a ngai a, ram rorelnaah Pathian ram a thlen theih nan inven thianghlim a ngai a ni,” a ti bawk.
He inkhawmah hian Deputy Speaker Lalfamkima, Supply Minister B. Lalchhanzova, Lunglei North bialtu MLA V. Malsawmtluanga, South Tuipui bialtu MLA Jeje Lalpekhlua leh ZPM Vice President C. Lalnunnema te pawhin thu an sawi.