Aizawl: United Forum of Bank Union (UFBU) kaihhruaiin Zirtawpni khan Mizorama Public Sector Bank-a thawktute chuan chawlhkar khata ni nga chhung chauh hnathawh (5 Days Banking) leh phut hrang hrang neiin Aizawl Zodin Square-a SBI Main Branch tualah lungawi lohna an lantir.
Bank hnathawktute punkhawmna hi UFBU Mizoram Convenor Samuel L. Chawngthu-in a kaihruai a, MRB atangin V. Lalrinnawia, Bank of India atangin Lalrinngheta leh SBI atangin JM Dawnga Chhangte ten thu an sawi.
Lungawi lohna an lantir chhante sawiin 5 Days Banking hman a nih theih nan te, Performance Linked Incentive (PLI) hmanlai hnuhdawha siam that a nih theih nan leh an thil phut dangte a hlawhtlin ngei an duh thu an sawi a. Ram dang tam zawkah 5 Days Banking hi tihhlawhtlin a ni tawh thu sawiin India-ah pawh hman ve tawh an phut thu an sawi bawk.
5 Days Banking chungchangah hian sorkar aiawh Indian Bank Association (IBA) chuan recommendation pawh sorkarah pe tawhin UFBU nen pawh inremna an ziak tawh a. Tun thlengin sorkarin a taka a zawm duh lo leh a tihhlawhtlin loh avangin hetianga nawrh hi buatsaih a ngai ta a ni niin an sawi.
UFBU buatsaih he lungawi lohna lantirna hi Mizoram chhungah pawh All India Regional Rural Bank Employee Association, Apex Bank, MUCO Bank leh Old Generation Private Bank thenkhatte pawhin an thlawp thu an tar lang.
Lungawi lohna an lantir hian awmzia a neih loh chuan September 28 atanga 30, 2026 thleng ni thum chhung nawrh leh an tum a. Hei pawh hian awmzia a nei lo a nih chuan October 26 atang hian tiam chin awm loin nawrh an chhunzawm zui an tum thu an sawi a ni.