Mizoram chhunga Mizoram Presbyterian Kohhran hnuaia pastor bial hrang hrangah Naupang Sunday School inkhawmpui chu Pathianni khan hman a ni.
Hemi atan hian Beginner Department atanga Sacrament Department thleng naupang ten Pathian thu, hla leh thu inchhang hmanga intihsiakin hun an hmang.
Bial tam zawkin inkhawmpui hi intihsiakna atan hmangin, bial thenkhat erawh chuan Pathian fakna leh zirlai ennawnna atan intihsiak lovin an hmang bawk.
Naupang inkhawmpui hi Missionary-te thahnemngaihna avanga neih tan a ni a, kum 1931 khan Aizawl Tlangnuam Kohhranah a hmasa ber atan hman a ni a. Tun hnuah bial hrang hrangte rualkhai zawka an kal theih nan Mizoram Presbyterian Sunday School Union (MSSU) chuan Sunday School zirlai syllabus thar ruahmanin, Beginner Department atanga Sacrament Department leh Pathianni vawi 3-naah Senior Department ten inkhawmpui an nei thin a ni.
Kumina inchhiarnaa MSSU hnuaiah hian Sunday School 1,050 awmin, hotu 4,467 leh zirtirtu 56,862 an awm mek a, zirtu zawng zawng 4,33,821 an awm bawk.